30 Shtator 2024

Nga Erjon Dervishi

Ushtria izraelite tashmë ka hyrë në territorin e Libanit. Janë mediat amerikane që e konfirmojnë një gjë të tillë. Sekretari amerikan i Shtetit ka dhënë një paralajmërim të fortë për Iranin që të mos ndërhyjë në këtë konflikt. Sakaq, nënkryetari i Hezbollahut është deklaruar i gatshëm për tu përballur me ushtrinë e Izraelit

Forcat izraelite tashmë janë brenda territorit të Libanit. Këtë fakt e kanë konfirmuar zyrtarët amerikanë, citon Wall Street Journal. Forcat izraelite kryen bastisje të operacioneve speciale në territorin libanez pranë kufirit Izrael-Liban të hënën në mëngjes. Një zyrtar i përshkroi ato bastisje për CNN si “sulme shumë të sakta, shumë të synuara, shumë të vogla” për të synuar në mënyrë specifike aftësitë e Hezbollahut.

Zyrtarët amerikanë aktualisht nuk i përshkruajnë këto sulme izraelite si një inkursion tokësor, edhe pse ata vazhdojnë të përgatiten me kujdes për mundësinë e një operacioni të kufizuar tokësor që mund të ndodhë në ditët në vijim. Sekretari Amerikan i Shtetit Antony Blinken denoncoi liderin e vrarë të Hezbollahut, Hassan Nasrallah si “një terrorist brutal” ndërsa ai bëri thirrje edhe një herë për diplomaci, raporton A2.

“Hassan Nasrallah ishte një terrorist brutal, viktimat e të cilit përfshinin amerikanë, libanezë, sirian dhe shumë të tjerë. Gjatë drejtimit të Hezbollahut, grupi terrorizoi njerëzit përgjatë rajonit dhe ndali Libanin për të ecur përpara. Libani, rajoni dhe bota është një vend më i sigurt pa të”, tha Anthony Blinken, Sekretari Amerikan i Shtetit, transmeton A2.

Ndërkohë kryeministri i Izraelit, Benjamin Netanyahu ka bërë një paralajmërim të fortë për Iranin si një nga mbështetësit kryesor të Hezbollahut.

“Unë flas më shumë për liderët e Iranit, por në këtë moment kyç, dua t’ju drejtohem juve – popullit të Iranit. Unë dua ta bëj këtë drejtpërdrejt, pa filtra, pa ndërmjetës. Nuk ka asgjë në Lindjen e Mesme që Izraeli nuk mund të arrijë. Nuk ka asnjë vend nga ku nuk do të shkojmë për të mbrojtur popullin tonë dhe për të mbrojtur vendin tonë. Në çdo moment që kalon, regjimi po ju sjell ju, popullin fisnik pers, më pranë humnerës. Por ju e dini një gjë të thjeshtë: tiranët e Iranit nuk kujdesen për të ardhmen tuaj. Kur Irani më në fund të jetë i lirë dhe ai moment do të vijë shumë më shpejt nga sa mendojnë njerëzit, gjithçka do të jetë ndryshe. Dy popujt tanë të lashtë, Populli hebre dhe populli pers, më në fund do të jenë në paqe dy vendet tona, Izraeli dhe Irani”, u shpreh kryeministri izraelit Benjamin Netanjahu, shkruan A2.

Shtetet e Bashkuara kanë paralajmëruar Iranin se në rast të një sulmi të drejtpërdrejtë ndaj Izraelit në ditët në vijim, përgjigja izraelite këtë herë do të ishte më e madhe dhe më e fortë se në prill. Mesazhi amerikan u dërgua përmes një vendi të tretë që ka marrëdhënie diplomatike me Iranin, shkruan Haaretz.

Sakaq, nënkryetari i Hezbollahut, Naim Qassem, në fjalimin e tij të parë publik që kur Izraeli vrau shefin e grupit Hassan Nasrallah, tha se lëvizja është e gatshme të përballet me çdo pushtim tokësor izraelit në Liban.

“Ne do të përballemi me çdo mundësi dhe jemi gati nëse izraelitët vendosin të hyjnë nga toka dhe forcat e rezistencës janë gati për një angazhim tokësor”, tha ai. (A2 Televizion)